UTUNGAJI.pdf (Size: 1.17 MB / Downloads: 18)

I LOVE YOU
Kizungu nimejaribu,
Nikwimbie mahabubu,
Ona ninapata tabu,
Nakupenda my dear!

Mwilini umezagaa,
Jina limetapakaa,
Usidhani chanjagaa,
Hadithi nasimulia!

Unanipa tabasamu,
Uliye wangu muhimu,
Mapenzi yako matamu,
Nashindwa kuhadithia.

Najiuliza maswali,
Huku nikiwaza mbali,
Na hivi silali sili,
Ai nimekuzimia!

Am sorry my dear,
Ikiwa nakusumbua,
Utenzi kukuimbia,
Upate kuninisia!

Sijui umeamka,
Au ungali kwa shuka,
Ewe ninaye kutaka,
Wake up my dear

Usidhani ni utani,
Vile naijua fani,
Unanitia jubuni,
Bila wewe ni udhia.

Sanga Sasa nanenepa,
Na kwako sitoki kapa,
Wanishika pale hapa,
Aah tamu nakwambia.


Na haya ndiyo mapenzi,
Kijana ninakuenzi,
Kupenda jina kitenzi,
Tupendane my dear.

Sasa nikwambie honey,
You are my number one,
Wengine naona nyani,
Bure kuning'ang'ania!

Ninatamani kutunga,
Ndefu beti kuzipanga,
But am not a singer,
Na muda unakimbia!

Siku nitakutungia,
Shairi tamu sikijia,
Usome lenye hisia,
Uanze kuniwazia!

Mtunzi Filieda Sanga
Mama B
Mabibo Dsm
0753738704

HACHUMI ASIYEPANDA
Uwe jemedari mwema, na roho isiyodoa,
Unapotaka kuchuma, kupanda ni shurutia,
Sawa bwana umelima, hukupanda ni udhia,
Hachumi asiyepanda, ndiyo mambo ya dunia.

Kwanza iweze kumea, mbegu chini ikazama,
Hapo huanza kukua, na uwe mti mzima,
Mizizi ikatokea, na shina likiwa wima,
Hachumi asiyepanda, ndiyo mambo ya dunia.

Matawi yakija nyuma, huo mti kupambia,
Moyonimwe utasema, kuvuna watarajia,
Maua huja chutama, matawini kuchanua,
Hachumi asiyepanda, ndiyo mambo ya dunia.

Matunda hujichumia, yawivapo ukachuma,
Uanze kushangilia, upatapo tunda jema,
Ni wapi umesiki, asiyepanda huchuma?
Hachumi asiyepanda, ndiyo mambo ya dunia.

Unapotaka kuchuma, ndugu yangu nakwambia,
Tia mbegu ukilima,nambari wani hatua,
Watarajia kuchuma, ndipo utajivunia,
Hachumi asiyepanda, ndiyo mambo ya dunia.

Beti sita nakimbia, nipande nipate chuma,
Ujuzi mekugawia, elimu yenye heshima,
Usijekuliwania, usilopanda kuchuma,
Hachumi asiyepanda, ndiyo mambo ya dunia.

Mtunzi Filieda Sanga
MAMA B
Mabibo Dsm
0753738704

HATUKUWA BINADAMU
Enzi zile za mababu, mke alikuwa nyani,
Hali tukipata tabu, tukateswa majumbani,
Kipigo nazo sulubu, vilikuwa maungoni,
Hatukuwa binadamu!

Kituona wanawake, meno hatuna vinywani,
Ni mangumi na mateke, meno yaanguke chini,
Na utake usitake, tulibakwa vitandani,
Hakuwa binadamu!

Yetu kazi ni uzazi, hatukuwa na thamani,
Ni duni yetu mavazi, mapaufu migongoni,
Pengine liitwa mbuzi, nayo majina ya nyuni,
Hatukuwa binadamu!

Mwiko kupata elimu, kutwa twapika jikoni,
Cheo hata umakamu, vilibakia ndotoni,
Mbaya ule msimu, nimekumbuka zamani,
Hatukuwa binadamu!

Tuamkeni insia, toka hapo kitandani,
Kiti tumekikalia, raia nambari wani,
Letu jina Ni Samia, mwenye vazi la kijani,
Hatukuwa binadamu!

Nashangaa wanawake, wanakiri hadharani,
Eti nao watamke afanyacho hatuoni,
Wanawake niwatake, Samia mteteeni,
Hatuwa binadamu!

Vita si lelemama, mke kubaki kitini,
Lazima kutuandama, kututia makosani,
Kucha wakitusakama, eti tunaweza nini,
Hatukuwa binadamu!

Semeni oye Samia, wamama tuunganeni,
Mwakana tucholilia, twende kule utumwani?
Kidete kusimamia, mtieni masifuni,
Hatukuwa binadamu!

Na huu ndio ushindi, anayebisha ni nani?
Wanawake kwa vikundi, imara tusimameni,
Tujue siye washindi, tumeshinda utumwani,
Hatukuwa binadamu!

Niwaamshe fikara, wanawake pulikani,
Vita sio masihara, habari hizi shikeni,
Japo hatuna vipara, zetu silaha shikeni,
Hatukuwa binadamu!

Mtunzi Filieda Sanga
MAMA B
Mabibo Dsm
0753738704

  MBINU ZA UTAFITI.pdf (Size: 182.29 KB / Downloads: 1)

DUNIA MWENDO WA NGISI

Nisikilize Kidawa, ewe mwanangu mpendwa
Neno langu nakugawa, kwako liwe la kupandwa
Mwana nikuweke sawa, kesho usijekupindwa
Dunia mwendo wa ngisi, isikuteke Kidawa.

Kidawa wangu sikia, neno langu ulishike
Babayo nakuambia, nataka uhamasike
Ungali waibukia, sitaki uhasirike
Dunia mwendo wa ngisi, isikuteke Kidawa

Tulikulea kwa dhiki, mamiyo kesha kwambia
Mengi hayahesabiki, ambayo tumepitiya
Ila kunena mithaki, yote tumevumilia
Dunia mwendo wa ngisi, isikuteke Kidawa

Ungali mkangaichi, maoziyo yana kiwi
Ila hauchi hauchi, kesho yatapata kawi
Daima mficha uchi, uzazini huwa hawi
Dunia mwendo wa ngisi, isikuteke Kidawa

Macho utapofumbua, uitazame dunia
Mtima utachanua, uhamu kuchapukia
Mwanangu hili tambua, babayo nashadidia
Dunia mwendo wa ngisi, isikuteke Kidawa

Ina vingi vipendezi, vya hadhi na shani yake
Isoisha uchombezi, hutaki hadi utake
Mwana nakupa hirizi, ujikingie makeke
Dunia mwendo wa ngisi, isikuteke Kidawa

Dunia tambara bovu, ukivuta utachana
Itakutia makovu, ukichezeya ujana
Ufumbate utulivu, kuepuka kuzozana
Dunia mwendo wa ngisi, isikuteke Kidawa

Dunia nzito tambua, endapo huna akili
Yaweza kukuumbua, nakukutia thakili
Leo ninakuzindua, tafakari kulihali
Dunia mwendo wa ngisi, isikuteke Kidawa

Dunia ni mduwara, huzunguka kama pia
Kwa idhini na kudura,hujirudia
Usitende kwa hasira, keshoye ukajutia
Dunia mwendo wa ngisi, isikuteke Kidawa

Dunia ni mapishano, Leo mbele kesho nyuma
Kuishi ni mapambano, kusotaka uadhama
Kushinda kwenye pigano, mtegemee Karima
Dunia mwendo wa ngisi, isikuteke Kidawa

Dunia ni maabara, jaribu hili na lile
Yatende kwa tahadhara, uepuke mizingile
Ujitoapo kafara, dunia ni ile ile
Dunia mwendo wa ngisi, isikuteke Kidawa

Dunia ni darubini, kwayo mwana jiakisi
Uishi kwa kubaini, na kuheshimu mapisi
Wenzako usiwahini, kwa tendo au kwa tusi
Dunia mwendo wa ngisi, isikuteke Kidawa

Adamu Djibril
Jibril Adam Abu sanaya

  RIPOTI YA UTAFITI KUHUSU SIFA ZA WAALIMU KITAALUMA.pdf (Size: 323.2 KB / Downloads: 0)

  UANDISHI WA TAMTHILIYA.pdf (Size: 80.77 KB / Downloads: 7)

  Shajara ya Somo.pdf (Size: 11.7 KB / Downloads: 15)

  UANDISHI WA RIPOTI NA KUMBUKUMBU ZA VIKAO.pdf (Size: 73.37 KB / Downloads: 34)