PIGENI KURA
Mshairi nimekwama, jamani pigeni kura,
Wanaume walalama, wanataka kunipora,
Wengi wao wanasema, wavutwa na yangu sura,
Jamani pigeni kura, madhara yasikute.

Mtunzi nagombaniwa, wa vitambi na vipara,
Sasa nachanganyikiwa, Nani kwangu ndiye bora?
Maneno nayoambiwa, tamu sio masihara,
Jamani pigeni kura, madhara yasinikute.

Kwa maneno ya kivuli, ataka aga kapera,
Ataka nimkubali, ndoa ikafjngwe mara,
Sasa mawazo ya mbali, nimezidiwa fikira,
Jamani pigeni kura, madhara yasinikute.


Abdul yule bwana, kijana mwenye kipara,
Zake mbinu nimeona, zenye janja na mikwara,
Hunitongoza kwa vina,  kumuacha ni hasara,
Jamani pigeni kura, madhara yasinikute.

Wasojua mashairi, mizani na mkarara,
Nao huongeza ari, hawachi jiparapara,
Sasa leo nimekiri, itanifika izara,
Jamani pigeni kura, madhara yasinikute.

Niseme nipate wote, yatanikuta madhara,
Nianze kutema mate, kutapika na kuhara,
Yangu hali iwe tete, ninyauke yangu sura,
Jamani pigeni kura, madhara yasinikute.

Nambieni nende wapi, kwao hao makapera,
Semeni bora ni kupi, nitakae mume bora,
Ikiwa raha hanipi, wangu moyo utafura,
Jamani pigeni kura, madhara yasinikute.

Siendi mbali nakoma, nawarushia mpira,
Hao wanoniandama, yupo nipate kisura?
Akili imenigoma, zimeniruka fikara,
Jamani pigeni kura, madhara yasinikute.

Filieda Sanga
Mama B
0753738704

  UANDISHI WA PENDEKEZO LA UTAFITI.pdf (Size: 101.85 KB / Downloads: 4)

  HATUA ZA UANDISHI NA UHARIRI.pdf (Size: 74.19 KB / Downloads: 0)


Kwa hisani ya >>>

  Matatizo ya Waandishi Chipukizi.pdf (Size: 152.5 KB / Downloads: 0)

  Matatizo ya Waandishi Chipukizi.pdf (Size: 74.88 KB / Downloads: 0)

  Mtindo wa kitaaluma.pdf (Size: 159.37 KB / Downloads: 0)

NIMEKUTUNUKU
Moyo hivi udundavyo, papasa changu kifua,
Na ndivyo hali ilivyo, nisije nikaugua,
Lazizi nikupendavyo, nashindwa kumsimulia.
Wengine ni majangili, mume wewe peke yako.


Wapo wale wanodhani, kupenda ninatania,
Nawatia darasani, wajue nimepania,
Wote nawaona nyani, viumbe wenye udhia
Wengine ni majangili, mume wewe peke yako.

Majina nitawataja, wakizidi nisumbua,
Wao mmojammoja, kikashani hunijia,
Sasa ninasema ngoja, siku nitawaumbua,
Wengine ni majangili, mume wewe peke yako.

Hawachi nibembeleza, nipendacho watajia,
Sanga ninawapuuza, jicho nikawatupia,
Hawaachi nichokoza, zote Mara hunijia,
Wengine ni majangili, mume wewe peke yako.

Kwakowe nimeridhika, tufurahie dunia,
Wanipa ninachotaka, ya nini kujisumbua,
Waniita malaika, kiumbe kunisifia,
Wengine ni majangili, mume wewe peke yako.

Beti hizi safusafu, mwendani nakutungia,
Wewe ndiwe mausufu, haki vema unajua,
Matendo matakatifu, mbinuze unazifua,
Wengine ni majangili, mume wewe peke yako.

Filieda Sanga
Mama B
Mabibo Dsm
0753738704

  2 KISW-MODERATION KWA MSIMAMIZI.doc (Size: 75.5 KB / Downloads: 13)

DOGO JANJA
Kweli mimi ni mdogo, lakini ni dogo janja,
Ningali ota magego, yenye mifupa kuvunja,
Sifanani na vigogo, si mwalimu ni kiranja,
Kweli mimi ni mdogo, lakini ni dogo janja.

Naweza kupiga mbizi, na kukatiza viwanja,
Sibanii kikohozi, hata iwe ninabanja,
Natafuta ubobezi, mashairi kuyachanja,
Kweli mimi ni mdogo, lakini ni dogo janja.

Msije kunipa tabu, mkaanza kunikunja,
Au mkanisulubu, shingo yangu kuichinja,
Sababu ya yangu nibu, mkadhani mimi ninja,
Kweli mimi ni mdogo, lakini ni dogo janja.

Sina chochote naanza, si tungo hata mkwanja,
Basi njoni kunifunza, tamu nipate kuonja,
Hii hatua ya kwanza, tungoni sio kanjanja,
Kweli mimi ni mdogo, lakini ni dogo janja.

Bure musinihukumu, mukanihisi mjanja,
Muniite mutalamu, nikamzidi Karanja,
Hapo nitawalaumu, sijai kwenye kiganja,
Kweli mimi ni mdogo, lakini ni dogo janja.

Nimeamua kurapu, nisimame paruwanja,
Pia natuma wasapu, zenu mbavu kuzivunja,
Uwashapo simu vupu! Tungo iingie nganja!
Kweli mimi ni mdogo, lakini ni dogo janja.

Beti saba nimegota, utamu sijawapunja,
Msijeleta matata, hamjala mumeonja,
Mkaanza kunisuta, huku ndita mumekunja,
Kweli mimi ni mdogo, lakini ni dogo janja.

Mtunzi Filieda Sanga
Mama B
Mabibo Dsm
0753738704

HAMJUI KUTONGOZA
Vijana wa mamboleo,hamjui kutongoza,
Mjapo mbeleni mwao,hamna cha kueleza,
Domo mwakosa funguo,mwabaki kulipugaza,
Mngerudi darasani,mjifunze kutongoza.

Si wajuvi wa maleba,mwenda mwajikurupuza,
Kheri mngevaa raba,si surwali kulegeza,
Hata mje Mara saba,miye ninawapuuza,
Mngerudi darasani,mjifunze kutongoza.

Imeshazuka mitindo,namba mwaziombeleza,
Kisha mwajiunga bando,muanze kututongoza,
Hamuhimili kishindo,macho tukikutaniza,
Mngerudi darasani,mjifunze kutongoza.

Hamuishi kujisifu,yaso yenu kueleza,
Mwazileta hoja mfu,wachovu kubembeleza,
Mnatupa usumbufu,maswali kutuuliza,
Mngerudi darasani,mjifunze kutongoza.

Wa Zenji hata Misungwi,kwingineko nauliza,
Au tuwape makungwi,muweze kubembeleza?
Msemapo miye mwangwi,nashindwa kusikiliza,
Mngerudi darasani, mjifunze kutongoza.

Nimefichua machovu,beti sitapitiliza,
Niwache wasuluhivu,njia wakaileteza,
Waupate ukomavu,ujinga kuukataza,
Mngerudi darasani,mjifunze kutongoza.

Mtunzi Filieda Sanga
Mama B
Mrs Onesmo
Mwl wa Kiswahili
Mabibo DSM
0766371726/0659393796
Facebook Filieda Sanga
Email filiedasanga@yahoo.com