JUA LA UTOSI
Linapochomoza jua,
Asubuhi na mapema,
Sote tunafurahia,
Kulivyokucha salama,
Basi jua husogea,
Mithili mtu kilema,
Katikati hufikia,
Hapo huzua zahama.

Dhahama hapo huzuka,
Jua hugonga utosi,
Wenye afia mashaka,
Kama nzi na mijusi,
Basi hapo hukauka,
Na wengine kwenye nyasi,
mfano mdudu nyoka,
Uhuru kujifilisi.

Lake joto ardhini,
Ni Nani anapekua?
Mwendo huwa mashakani,
Pasi kiatu kuvaa,
Huzidi jasho mwilini,
Mavazi yanavyoloa,
Hali huwa matatani,
Jua huwa lawamani.

Kiu nazo hutubana,
Na maji hatutosheki,
Hata yawe mengi sana,
Au tukanywa wanzuki,
Twataka tena na tena,
Sababu hatutosheki,
Madhila huzidi sana,
Maisha hujaa dhiki.

Jua hapo halikwami,
Lasogea taratibu,
hapo tena halivumi,
Limekwisha tuadhibu,
Tunafunga zetu ndimi,
Muda metupa jawabu,
Tena halitusakami,
Kutuangushia tabu.

Inapofika jioni,
Jua laanzafifia,
Twaanza kulitamani,
Nje tunajitokea,
Tukipata vitamini,
Tena twalifurahia,
Mara jua hatuoni,
Kiza hapo hutokea.

Kiza hapo hutokea,
twaanza kupapasana,
Jua tunalilia,
Livyokwenda mbali sana,
mwishowe tunanyamaa,
Namna hapo hatuna,
Jambo tunaloshangaa,
Kesho tena twaliona.

Ndivyo yalivyo maisha,
Tunapita panda shuka,
pengine hujipitisha,
Penye tabu na kuchoka,
Mara tabu zinaisha,
tunaanza kujicheka,
ndiyo hali ya maisha,
Kila hali tunafika.

Mtunzi Filieda Sanga
Mama B
Mabibo Dsm
0753738704

UCHAMBUZI - WAKATABAHU
Wakatabahu (Wa-kataba-hu) وكتبه ni kitenzi cha Lugha ya Kiarabu chenye maana (Ameuandika (waraka huu) fulani bin fulani.
Neno hili jumuishi huandikwa mwishoni mwa waraka/barua kumtaja mwandishi wa waraka huo/barua hiyo.
Neno hili kwa Kiingereza ni sawa na kusema: 'written by.../It is written by....'.
Ni desturi ya Waarabu kuandika hivyo mwisho mwa waraka/barua na kwa kuwa Waswahili walianza kukiandika Kiswahili kwa herufi za Kiarabu na hili nalo wakalibeba na kuwa mtindo wa uandishi wa barua zao.
Kiuchambuzi neno hili jumuishi linaundwa na maneno manne: matatu yanadhihiri na moja linajificha kama ifuatavyo:
1. WA ni Kiunganishi maana yake 'na'.
2. KATABA ni kitenzi kinachoihusu nafsi ya tatu ya kiume (kwa Kiingereza 'He') na Kiswahili (Yeye). Maana ya KATABA kwa Kiswahili: Ameandika.
3. HU ni Kiwakilishi nafsi ya tatu kikiwakilisha Shamirisho (Kilichoandikwa).
Tanbihi: Maneno ya Kiarabu kama ilivyo kwa Kifaransa yanahusika na mgawanyo wa kijinsia. Hivyo kama Shamirisho ni kitu cha jinsia ya kiume utatumia 'HUU' na kama ni jinsia ya kike utatumia 'HAA', yaani utasema: KATABAHAA كتبها.
4. Neno lisilodhihiri ni Kiwakilishi cha Nafsi ya Tatu ya Kiume na ndiye Mtendaji wa kitenzi. Ukisema KATABA (ameandika) kitenzi tayari kimeashiria aliyeandika ni mwanamume. Na kama ni mwanamke kitenzi kitakuwa: KATABAT كتبت. (Ameandika mwanamke).

Na.
Khamis Mataka

KAZI YA NANI MALEZI?

Baba:

Baba nipo kataani, sikubali jambo hili,
Hanifiki akilini, kwani sioni halali,
Mtoto alee nani, baba! Hilo sikubali,
Kazi ya mama malezi, baba natafuta mali.

Mama:

Bwana ungebadilika, zetu enzi sio zile,
Tena ufanye haraka, utaaibika mbele,
hicho unachotamka, nakucheka ni ukale,
Zimebadilika zama, malezi mama na baba.

Baba:

Shule imekuharibu, mwanamke kaa chini,
Umeishiwa adabu, hiyo ni tabia gani?
Mie na zangu sharubu, huyo mwana tampani?
Kazi ya mama malezi, baba natafuta mali.

Mama:

Ishushe yako sauti, taamsha majirani,
Ukujalie umati, katikati ya manani,
Wanitupia kijiti, nilee peke kwa nini,
Zimebadilika zama, malezi mama na baba.

Baba:

Umeanza mazoea, kielimu uchopata,
Ujue nakushangaa, mama uache Matata,
Nani unamtupia, hiyo kazi ulopata?
Kazi ya mama malezi, baba natafuta mali.

Mama:

Wajua kazi malezi, au bure unafoka?
Kikwachia hauwezi, majasho yatakutoka,
Tofauti chini weka, tufanye sote malezi,
Zimebadilika zama, malezi mama na baba.

Baba:

Hebu tia umuhimu, hicho witacho malezi,
Bure unanilaumu, ninaona ni upuzi,
Hakinipi utimamu, wawili kwa moja kazi,
Kazi ya mama malezi, baba natafuta mali.