MANARA NI WEWE?
Dunia mwendo wa ngisi, mambo yanabadilika,
Mengine sio rahisi, ghafla yakageuka,
Ni mazito si mepesi, kwa punde yakalipuka,
Manara si wewe?

Ulisema Bora kufa, kwenda yanga ni udhia,
Kwani hapo umekufa, Kama uvyotuambia?
Umetutia ulofa, huko umekimbilia,
Manara si wewe?

Utopolo liwaita, hao Young Africa,
Sasa umajipukuta, mithili hukutamka,
Umeenda kujikita, Simba umewageuka,
Manara ni wewe?

Kuwaka na kuzimika, kweli maisha maua,
Vile ulivyolipuka, Kama Moto wa mabua,
Na mwisho ukazimika, Manara kimyaaa,
Manara ni wewe?

Sasa umekuwa popo, Wala hulishiki moja,
Ingawa wazuri wapo, ungeondoka kwa hoja,
Umetaka kilichopo, Wala hatusemi ngoja,
Manara si wewe?

Basi heri nakutia, uendako salimika,
Wahenga watuambia, ugenini ukifika,
Usijekupuuzia, ulikotoka kumbuka,
Manara ni wewe?

Beti chache nasimama, baibai we Manara,
Usidhani tumekwama, Simba bado tunang'ara,
Kile tulichokifuma, hakifumuki Manara,
Manara ni wewe?

Mtunzi Filieda Sanga
Mama B
Mabibo Dsm
0753738704

ANA TABU ASKARI
Maisha ya Askari, ya kufa ama kupona,
Yeye huona fahari, nchi yake ikipona,
Tena anajawa ari,halali anakazana,
Ana tabu Askari!

Hujavalia kombati, zake risasi begani,
Miguuni ana buti, na mkanda kiunoni,
Na siye tuvae suti, hujiona furahani,
Ana tabu askari!

Usiku huyu halali, nchi ibaki salama,
Hufika kila mahali, wima ama kachutama,
Na mtu huyu hajali, afe yeye hata kama,
Ana tabu askari!

Huiacha familia, hali mkewe mpweke,
Yake nchi kulilia, salama isalimike,
Ajabu nawaambia, yu radhi ahatarike,
Ana tabu askari!

Mshairi nimeona, nimtie utungoni,
Naye nimpange vina, na hadhira mbaini,
Mtu wa yake aina, nimeona duniani,
Ana tabu Askari!

Mtunzi Filieda Sanga
Mama B
Mabibo Dsm
0753738704

  UCHAMBUZI WA RIWAYA YA UA LA FARAJA.pdf (Size: 161.45 KB / Downloads: 1)

  UCHAMBUZI WA RIWAYA YA NAGONA.pdf (Size: 170.51 KB / Downloads: 5)

  UCHAMBUZI WA RIWAYA YA MZINGILE.pdf (Size: 242.86 KB / Downloads: 0)

  UCHAMBUZI WA RIWAYA YA KICHWA MAJI.pdf (Size: 136.63 KB / Downloads: 6)

  UHAKIKI NA UCHAMBUZI WA RIWAYA YA NAKURUTO.pdf (Size: 108.57 KB / Downloads: 0)

HACHINJI BATA

Hili ninalokwambiya, lisijekupa utata,
Yakupasa kutuliya, ili maana kupata,
Ukiwa ni mpupiya, hautaambua hata,
Mtu mpita na ndiya, hafai kuchinja bata.

Ninenalo zingatiya, wenda ukawa mpita,
Wakikuita kimbiya, na kataa katakata,
Vichochoroni ingia, ukiona kona kata,
Mtu mpita na ndiya, hafai kuchinja bata.

Ela kuku ni sawiya, kuchinja usijewata,
Tena nduu furahiya, kuku hanayo matata,
Kuku hautakawiya, shida haitakukuta,
Mtu mpita na ndiya, hafai kuchinja bata.

Si kwamba nakutishiya, yakuwa bata ang'ata,
ila bata hutumiya, kitambo roho kukata,
Hivyo hutasubiriya, mambo yako utawata,
Mtu mpita ndiya, hafai kuchinja bata.

Kikomo nimefikiya, unyoya kando nakita,
Najua wafikiriya, akili yabiringita,
Shika nilokuhusia, kuchinja bata ni vita,
Mtu mpita na ndiya, hafai kuchinja bata.

Mshairi Machinga,
mfaumehamisi@gmail.com,
+255716541703/752795964,
Dar es salaam, Kkoo.

SASA NAACHA KUTUNGA
Ninapata majaribu, tungo hizi nikitunga,
Isijenikuta taabu, mwisho munione bunga,
Kuacha Kuna sababu, sitaki tena kutunga,
Tatizo ni wanaume, wananitaka mtunzi.

Hunijia kikashani, maneno yao kupanga,
Ati wao taabani, kunipenda mie Sanga,
Hunitia kitanzini, vijana wenye kilanga,
Tatizo ni wanaume, wananitaka mtunzi.

Wengine hunirubuni, kwayo mapenzi machanga,
Wataka niweka ndani, kwa malizo kunihonga,
Ninaye wangu mwendani, wanaume hilo chunga,
Tatizo ni wanaume, wananitaka mtunzi.

Mara umekula nini, ewe mtoto wa Sanga,
Wananitega jamani, ninashindwa kuwachenga,
Mwisho niitwe muhuni, watu hawa kama wanga,
Tatizo ni wanaume, wananitaka mtunzi.

Wengine nimebaini, wanazo nyingi faranga,
Japo mie masikini, wameshindwa kunihonga,
Sihongeki tambueni, jambo hili nalipinga,
Tatizo ni wanaume, wananitaka mtunzi.

Wasomaji buruani, mkono wangu napunga,
Na tungo hamzioni, ufundi ninaufunga,
Kujitia kitanzini, ni heri ningejitenga,
Tatizo ni wanaume, wananitaka mtunzi.

Huniita vipi hani, nami waweza nitunga?
Nikutunge kitu gani, wewe umekuwa shanga?
Maneno ya kidizaini, watu hawa hunilenga,
Tatizo ni wanaume, wananitaka mtunzi.

Sasa nipo kataani, mwisho wa tungo nagonga,
Hata wangenipa nini, bilingani au kanga,
Nadanganya, jaribuni, katu siwezi kutanga,
Tatizo ni wanaume, wananitaka mtunzi.


Mtunzi Filieda Sanga
MAMA B
Mabibo Dsm
0753738704

SASA NAACHA KUTUNGA
Ninapata majaribu, tungo hizi nikitunga,
Isijenikuta taabu, mwisho munione bunga,
Kuacha Kuna sababu, sitaki tena kutunga,
Tatizo ni wanaume, wananitaka mtunzi.

Hunijia kikashani, maneno yao kupanga,
Ati wao taabani, kunipenda mie Sanga,
Hunitia kitanzini, vijana wenye kilanga,
Tatizo ni wanaume, wananitaka mtunzi.

Wengine hunirubuni, kwayo mapenzi machanga,
Wataka niweka ndani, kwa malizo kunihonga,
Ninaye wangu mwendani, wanaume hilo chunga,
Tatizo ni wanaume, wananitaka mtunzi.

Mara umekula nini, ewe mtoto wa Sanga,
Wananitega jamani, ninashindwa kuwachenga,
Mwisho niitwe muhuni, watu hawa kama wanga,
Tatizo ni wanaume, wananitaka mtunzi.

Wengine nimebaini, wanazo nyingi faranga,
Japo mie masikini, wameshindwa kunihonga,
Sihongeki tambueni, jambo hili nalipinga,
Tatizo ni wanaume, wananitaka mtunzi.

Wasomaji buruani, mkono wangu napunga,
Na tungo hamzioni, ufundi ninaufunga,
Kujitia kitanzini, ni heri ningejitenga,
Tatizo ni wanaume, wananitaka mtunzi.

Huniita vipi hani, nami waweza nitunga?
Nikutunge kitu gani, wewe umekuwa shanga?
Maneno ya kidizaini, watu hawa hunilenga,
Tatizo ni wanaume, wananitaka mtunzi.

Sasa nipo kataani, mwisho wa tungo nagonga,
Hata wangenipa nini, bilingani au kanga,
Nadanganya, jaribuni, katu siwezi kutanga,
Tatizo ni wanaume, wananitaka mtunzi.


Mtunzi Filieda Sanga
MAMA B
Mabibo Dsm
0753738704