SHAIRI: JIVI

[MwlMaeda]

JIVI
Sema yote umalize,kwa hili sidanganyiki
Zipige nari na zeze,fahamu sirubuniki
Funga moyo ujikaze,Nkwazi hanusuriki
Yameona mato yangu,haya sikuhadithiwa

Haya sikuhadithiwa,niliwafuma pahala
Wawili mithili njiwa,kwa mahaba raha mwala
Ukanipata ukiwa,usingizi sikulala
Yameona mato yangu,haya sikuhadithiwa

Wanawake muna mbinu,mufichapo yenu Mambo
Hufutikwa kwenye kinu,jitu lenye kubwa umbo
Mume akose fununu,kuna jivi lala vyombo
Yameona mato yangu,haya sikuhadithiwa

Sina mashaka na Njau, ni njema zake tabia
Hana tamaa ya nyau,vya watu kuwaibia
Hata pesa kisahau,mbio hukurudishia
Yameona yangu mato,haya sikuhadithiwa

Na like jekundu ua,Jana alokutumia?
Wacha uongo kuzua,Filieda naumia
Hivi kweli watambua,kuwa ninaangamia
Yameona yangu mato,haya sikuhadithiwa

Hapa vema kuishia,mengine soni kunena
Usambe ninatishia,najichunga muungwana
Mengine nabakishia,vyuma visije umana
Abdul Ndembo(Wingu zito)
Mburahati sekondari