SHAIRI: MGANGA NI MUNGU

[MwlMaeda]

MGANGA NI M’NGU
Shairi nalitungile, lije kwenu walimwengu
Ndanimwe lina makele, lisomeni ndugu zangu
Si fumbo lende kwa yule, usiku mvunja vyungu
Mganga wangu ni M’ngu, Nawambia msikile

Nawambia msikile, mganga wangu ni M’ngu
Ndo kisa ile mishale, katu haifiki kwangu
Kila chombo na wimbile, msemo wa kaka yangu
Anilindaye Mlungu, si hirizi nawambile

Si hirizi nawambile, anilindaye Mlungu
Kwake mwilini zi tele, kesha mafungu mafungu
Paka mia achinjile, hafiki daraja langu
Mkombozi wangu Mungu, hawezi kunipa ndwele

Hawezi kunipa ndwele, mkombozi wangu Mungu
Vilingeni ashindile, haishiki nyota yangu
Sijida kwa muumbile, wa ardhi nayo mbingu
Akiabudu mizungu, atakuja afilile

Atakuja afilile, akiabudu mizungu
Tamati natamatile, mwambieni Mlimwengu
Mimi ni mja vivile, ana yake nina yangu
Riziki ilo ya kwangu, sihiri aishikile

MBARUKU ALLY
MOTO WENU
0717199835
Nikiwa Dodoma
Mzaliwa Moa Tanga