SHAIRI: NINAPOTAKA KUTUNGA

[MwlMaeda]

NINAPOTAKA KUTUNGA

Mashairi sio shanga, niwaamuru tungeni,
Iwe vina kuvipanga, vya urari wa mizani,
Msidhani mie Sanga, nitampinga Shabani,
Kwanza vina na mizani, msije kuviboronga.

Neno ninawapa chunga, zake kanuni shikeni,
Mtunzi kuwa mchanga, ajabu yake ni nini?
Wengi wanamangamanga, wajui waanze nini,
Pili dhamira kupanga, la sivyo vina vya nini?

Mvunja kanuni mwanga, afaani kwenye fani,
Huyo bora kumchenga, nasema mkimbieni,
Sindano ninawadunga, habari hizi shikeni,
Tatu muwala jueni, ama hapo wapuyanga.

Kanunize ndio kinga, ndugu zangu jikingeni,
Leo nimewapa mwanga, njia hiyo tembeeni,
Wengine Wana kilanga, bure kuwa masifuni,
Nne Sasa naitinga, utoshelezi wekeni.

Jama acheni vimbwanga, mtungazo tungo gani?
Naona mwa tangatanga, zenu tungo chunguzeni,
Mara mizani mwapanga, Mara toba taabani,
Tano mizani shikeni, urarini kujifunga.

Sasa mkono napunga, kwa herini kwa herini,
Hapa ninatia nanga, ya nini kuwachosheni,
Mwishowe mseme Sanga, Mama huyu mwogopeni,
Mwisho lugha iwekeni, ya sanaa na sitara.

Filieda Sanga
Mabibo Dsm
0753738704