SHAIRI: KIKUKU

[MwlMaeda]

KIKUKU

Alosema Mbaruku, mzawa wa Moa Tanga,
Nami leo kwa shauku, mkono ninayaunga,
USIVAE.

Kidubwana hiko aku! Ninakiona ni janga,
Huipoteza shauku, moyo huupa kisanga,
USIVAE.

Sijali kule na huku, jamii ikinizonga,
Nikionwa zumbukuku, hata wanione nanga,
USIVAE.

Nikipiga marufuku, hadharani nikipinga,
Usije vaa kikuku, kibata hata kikanga,
USIVAE.

Nishatoa dukuduku, kikomo natia nanga,
Nyonda hicho ukipiku, hata kiwe cha ushanga,
USIVAE.

Mshairi Machinga,
mfaumehamisi @gmail.com,
+255716541703/752795964,
Dar es salaam, Kkoo.