SHAIRI: I LOVE YOU

[MwlMaeda]

KWA HERI YA BAIBAI
1. Penzi lako LA mgao, filieda halinifai,
Wape haohaohao, waombao kwa kudai, wape hao wafaao, baadaye wajidai,
Penzi limenikinai kwa heri ya kuonana.

2. Wagawa huko na huku, uombwapo hukatai!?
Washusha yangu shauku, na heshima haikai!
Nenda katafune kuku, tena na yake mayai,
Penzi limenikinai, kwa heri ya kuonana.

3. Unanipa dukuduku, haugawiki kwa pai!
Unaniona kapuku, unakana zangu rai,
Nimelifunga sanduku, sitaki unilaghai,
Penzi limenikinai, kwa heri ya kuonana.

4. Sikutaki sikutaki, naogopa vurumai,
Niache na yangu dhiki, hunidai sikudai,
Kwa kweli sikudhihaki, nimekwishakukinai,
Penzi limenikinai, kwa heri ya kuonana.

5. Kwa heri ya kuonana, kwa heri ya baibai,
Nenda kwa hao wa mana, wavaao suti tai,
Huko kwa wako mabwana mkale wali na chai,
Penzi limenikinai, kwa heri ya kuonana.

6. Kwangu usirudi tena, kwa vile huna madai,
Umeniumuza sana, kuchanganya hili tui,
Hakika nimeshaona, wewe kwangu ni adui,
Penzi limenikinai, kwa heri ya kuonana.

7. Nenda ukaneemeke, nakuombea uhai,
Bwana hao uwashike, mfike hata Dubai,
Ila kwangu usifike, kimwana kiruirui,
Penzi limenikinai, kwa heri ya kuonana.