+- JIFUNZE KISWAHILI (https://jifunzekiswahili.co.tz)
+-- Forum: My Category (https://jifunzekiswahili.co.tz/forumdisplay.php?fid=1)
+--- Forum: Fasihi simulizi (https://jifunzekiswahili.co.tz/forumdisplay.php?fid=6)
+---- Forum: Ushairi (https://jifunzekiswahili.co.tz/forumdisplay.php?fid=50)
+---- Thread: SHAIRI : TUCHAGUE KWA MAKINI VIONGOZI TANZANIA (/showthread.php?tid=1982)
SHAIRI : TUCHAGUE KWA MAKINI VIONGOZI TANZANIA - MwlMaeda - 01-04-2022
- Hoja ninaieleza, uchaguzi Tanzania
Ni yupi anyeweza, usukukani kuchukua?
Pasi kutudidimiza, tupate kumchagua
Tuchague kwa makini, viongozi Tanzania
- Wengi wamejitokeza, nafasi kuziwania
Sera wanatueleza, watakazozitumia
Ahadi zinapendeza, wanazotutangazia
Tuchague kwa makini, viongozi Tanzania
- Wengi wamejitokeza, ikulu kugombania
Mazuri wayatangaza, tupate kuwachagua
Kama ukiwachunguza, ni vigumu kuamua
Tuchague kwa makini, viongozi Tanzania
- Ugumu ninaowaza, ni jinsi ya kuchagua
Kila mtu atangaza, ndiye anayetufaa
Kutuondolea giza, na kutuletea taa
Tuchague kwa makini, viongozi Tanzania
- Sera wanazoeleza, wakiwa kwenye jukwaa
Kama wakitekeleza, tuendako kunang’aa
Swali ninajiuliza, ni nani anotufaa
Tuchague kwa makini, viongozi Tanzania
- Nataka kupendekeza, jambo la kuzingatia
Umakini natangaza, ndio wa kutegemea
Lisijekutuumiza, maamuzi kujutia
Tuchague kwa makini, viongozi Tanzania
- Mola pekee anaweza, kutupatia “Kifaa”
Maombi tukiongeza, Yeye atatusikia
Kamwe hatutateleza, Mungu kumtegemea
Tuchague kwa makini, viongozi Tanzania
- Asiyejitanguliza, kwake kujipakulia
Mwenye kuitekeleza, katiba ya Tanzania
Tuchague kwa makini, viongozi Tanzania
9. Yule asiyewabeza, fukara kuwabagua
Aweza kuwatangaza, mali wanotuibia
Vijana nao ajuza, aweze kuwatetea
Tuchague kwa makini, viongozi Tanzania
10. Awezae kuzitunza, mali zote zaraia
Wageni wanowekeza, wazingatie sheria
Aweze kuwahimiza, kodi zetu kulipia
Tuchague kwa makini, viongozi Tanzania
11. Ninarudia kukaza, jibu la Watanzania
Maombi jambo la kwanza, Mola asikie dua
Mmoja kumchomoza, hata wangekuwa mia
Tuchague kwa makini, viongozi Tanzania
12. Tumuombeni Muweza, hekima kutujalia
Tusipate makengeza, wakati wa kuchagua
Kalamu isijecheza, na kisha tukakosea
Tuchague kwa makini, viongozi Tanzania
13. Naomba kuwahimiza, tuombee wagombea
Mungu aweze watunza, afya usalama pia
Kampeni kumaliza, bila baya kutokea
Tuchague kwa makini, viongozi Tanzania
14. Maadui wanaweza, Uchaguzi kutumia
Mabaya kuyapenyeza. ili kutuchafulia
Lakini Mungu aweza, mabaya kutukingia
Tuchague kwa makini, viongozi Tanzania
15. Jingine linaloweza, majanga kutuletea
“Media” zikitangaza, upande kuegemea
Au zikitueleza, mambo yanayochochea
Tuchague kwa makini, viongozi Tanzania
16. Shairi nalikatiza, hapa sitaendelea
Maneno niloeleza, nibudi kuzingatia
Mungu uliye Muweza, ibariki Tanzania
Tuchague kwa makini, viongozi Tanzania