+- JIFUNZE KISWAHILI (https://jifunzekiswahili.co.tz)
+-- Forum: My Category (https://jifunzekiswahili.co.tz/forumdisplay.php?fid=1)
+--- Forum: Majadiliano ya Wadau wa Kiswahili (https://jifunzekiswahili.co.tz/forumdisplay.php?fid=16)
+--- Thread: ETIMOLOJIA YA MANENO ' FADHAA' na 'FAZAA' (/showthread.php?tid=1794)
ETIMOLOJIA YA MANENO ' FADHAA' na 'FAZAA' - MwlMaeda - 12-23-2021
HII NDIYO ETIMOLOJIA YA MANENO ' FADHAA' na 'FAZAA'
Neno *fadhaa* katika lugha ya Kiswahili (kwa mujibu wa Kamusi Kuu ya Kiswahili Sanifu na Kamusi ya Kiswahili ya Karne ya 21) lina maana zifuatazo:
1. *Nomino* : Kosa utulivu wa moyo kutokana na jambo fulani ambalo ama umefanyiwa wewe au umemfanyia mtu mwengine ambalo aghalabu huwa si jema.
2. *Nomino:* Hali ya wasiwasi.
Katika lugha ya Kiarabu, neno hili *fadhaa* (soma: *fadhaun/fadha-an/fadhain فذع* ) ni nomino yenye maana ya ' *jeuri* '.
Ama neno *fazaa* ambalo ni mashuhuri uswahilini na ambalo linachukuliwa kuwa kisawe cha neno *fadhaa* , katika lugha ya Kiarabu ni nomino inayotokana na kitenzi *faza.a/fazi.a* *فزع* ambacho kina maana zifuatazo:
1. *Faza.a فزع* amefazaika/amefadhaika.
2. *Faza.a ilayhi فزع إليه* ameomba hifadhi/amemba msaada.
3. *Faza.aahu فزعه* amemnusuru/amemsaidia.
4. *Faza.a min nawmihi فزع من نومه* ameamka kutoka usingizini.
Hiyo nomino *fazaa فزع* katika lugha ya Kiarabu ina maana zifuatazo:
1. Khofu/hofu na wasiwasi.
2. Kuomba hifadhi/ukimbizi.
3. Kuomba msaada.
Kinachodhihiri ni kuwa wataalamu wetu wamelichukua kutoka Kiarabu neno *fadhaa فذع* lenye maana ya ' *ujeuri* ' wakalipa maana ya neno la Kiarabu *fazaa فزع* lenye maana ya khofu/hofu na wasiwasi.
*Shukran sana.*
*Khamis S.M. Mataka.*