01-06-2022, 08:43 AM
NITARUDI VUMILIA
Barua uloituma, muhibu imenifika
Mwili unanitetema, kwayo uliyoandika
Wallahi sijakuhama, wala sijabadilika
Malengo sijayafika, kwa vipi nirudi nyuma?
Sharifa mpenzi wangu, punguza kusononeka
Natafuta kwa uchungu, kila nikiwakumbuka
Siku ya kurudi kwangu, ni pesa nikizishika
Shikamana na subira, malipoye huwa mema
Vipi jina la mwanangu, ni lile nilotamka
Au kuwa mbali kwangu, lenu m’mempachika
Utakosa radhi zangu, ikiwa yametendeka
Mke kumpinga mume, hilo kosa kwa Manani
Nililoliacha genge, kama limefilisika
Mke wangu usivunge, panga kamata haraka
Pori langu licharange, lima hata nusu eka
Upatacho utakula, na ziada utauza
Nisalimie wajomba, nguo wanaonivika
Mwana wangu kumpamba, wema uso mithilika
Ninamuomba Muumba, awalipe pasi shaka
Jaza ya wema ni wema, pia na kinyume chake
Kengele imeshagonga, na bosi ameshafika
Safu naenda kuunga, ninaacha kuandika
Kumbuka tumejifinga, ombi usije chepuka
Nilindie penzi langu, kama nilindavyo lako
MBARUKU ALLY
MOTO WENU
0717199835
Nikiwa Dodoma
Mwl Maeda