SHAIRI : KILA LA KHERI MNYAMA!

[MwlMaeda]

SHAIRI : KILA LA KHERI MNYAMA!
malengo tumefikia,
na kuongea ziada,
timu pendwa Tanzania,
hata ukivuka boda,
kweli mmejitolea,
na sio nguvu ya soda,
KILA LA KHERI MNYAMA,
LOLOTE LAWEZEKANA!

mpira zake tisini,
basi shusheni presha,
Mazembe sio majini,
hawana cha kututisha,
nyie kandanda pigeni,
hata sare inatosha,
KILA LA KHERI MNYAMA,
LOLOTE LAWEZEKANA!

Manula top golia,
tulia baba golini,
na Coulibally kulia,
baba tupe burudani,
Tshabalala nawe pia,
panda juu shuka chini,
KILA LA KHERI MNYAMA,
LOLOTE LAWEZEKANA!

kamanda Nyoni na Juko,
walinzi wa usalama,
wakabeni huko huko,
si fedheha ni lawama,
zisije katiza ngoko,
ukuta uwe wa chuma,
KILA LA KHERI MNYAMA,
LOLOTE LAWEZEKANA!

Kotei Mkude Simba,
mmelibeba jahazi,
kamateni hilo dimba,
yani iwe kazi kazi,
wapigisheni msamba,
Mazembe hawajiwezi,
KILA LA KHERI MNYAMA,
LOLOTE LAWEZEKANA!

Niyonzima triple C,
imwageni hiyo radhi,
wachezesheni nani li,
wakalale na maradhi,
na ongezeni bidii,
tuwazidishe maudhi,
KILA LA KHERI MNYAMA,
LOLOTE LAWEZEKANA!

Kagere Okwi na Boko,
tupeni shangwe jamani,
linatosha goli moko,
hata matatu wekeni,
tuwatoe huko huko,
wabaki hawaamini,
KILA LA KHERI MNYAMA,
LOLOTE LAWEZEKANA!

Dilunga pasha misuli,
kawamalize kabisa,
matokeo kabadili,
hao nyoka wa kibisa,
nenda kawalaze chali,
haifai kuwakosa,
KILA LA KHERI MNYAMA,
LOLOTE LAWEZEKANA!

mashabiki nyuma yenu,
dua tunaomba sana,
wachezesheni mayenu,
mara bao mara kona,
onesheni hadhi yenu,
dunia inawaona,
KILALA KHERI MNYAMA,
LOLOTE LAWEZEKANA!

Tanzania zamu yetu,
tuoneshe uzalendo,
tuondoe kila kitu,
moyo tujaze upendo,
Simba akimla mtu,
ni halali si magendo,
KILA LA KHERI MNYAMA,
LOLOTE LAWEZEKANA!

Tuondoke Lubumbashi,
tukiwa kifua mbele,
yani pawe hapatoshi,
Simba pigeni kelele,
gwaride kama la jeshi,
ni furaha ya kilele,
KILA LA KHERI MNYAMA,
LOLOTE LAWEZEKANA!

Mwenyezi tukamatie,
Mazembe nyumbani kwao,
hata sare tupatie,
iwe ya bao kwa bao,
nawe Mungu wetu sie,
tukubalie wanao,
KILA LA KHERI MNYAMA,
LOLOTE LAWEZEKANA!