+- JIFUNZE KISWAHILI (https://jifunzekiswahili.co.tz)
+-- Forum: My Category (https://jifunzekiswahili.co.tz/forumdisplay.php?fid=1)
+--- Forum: Fasihi simulizi (https://jifunzekiswahili.co.tz/forumdisplay.php?fid=6)
+---- Forum: Ushairi (https://jifunzekiswahili.co.tz/forumdisplay.php?fid=50)
+---- Thread: SHAIRI: FUKARA (/showthread.php?tid=610)
SHAIRI: FUKARA - MwlMaeda - 07-21-2021
Fukara
Fukara hapati konde, jembele likatumika
Mazao humo apande, kwa wingi yakapatika
Lake kuzoga umande, na nguvuze kumtoka
Mwishowe kwenda upande, mgongo ukakatika.
Fukara yake faraja, ni mate kumdondoka
Watu wakikidhi haja, kwa minofu ya kuoka
Harufu kwake zikaja, na pua ikatanuka
Hata roho ikataja, lini kwake itafika.
Jirani akifurahi, siku ya pili kufika
Yeye hana masilahi, amekosa chakupika
Ishafika asubuhi, na macho yashamtoka
Ni lipi kwake sahihi, kama mja kutumika?
Fukara hana rafiki, moyoni alomuweka
Wakwasi hawamtaki, kuombwa wameshachoka
Anofaidi ni dhiki, na mazonge kuzongeka
Mwishowe hufanya chuki, na hasadi kujengeka.
Ufukara ukizidi, nchi itasawajika
Sababu ya uhasidi, na mali zitageleka
Nyoyo zikataradadi, furaha itafutika
Zitadamiri biladi, thamaniye itashuka.
Enyi wenye karatasi, ambazo zahesabika
Fanyeni haraka basi, mambo yasije chafuka
Ufukara ni utesi, heshima utatupoka
Nawaita wangu mbasi, tutoweni pasi shaka.
Ali Ben Othman
Zanzibar
21/7/2021
3:50