+- JIFUNZE KISWAHILI (https://jifunzekiswahili.co.tz)
+-- Forum: My Category (https://jifunzekiswahili.co.tz/forumdisplay.php?fid=1)
+--- Forum: Fasihi simulizi (https://jifunzekiswahili.co.tz/forumdisplay.php?fid=6)
+---- Forum: Ushairi (https://jifunzekiswahili.co.tz/forumdisplay.php?fid=50)
+---- Thread: SHAIRI: NYOYO ZETU (/showthread.php?tid=603)
SHAIRI: NYOYO ZETU - MwlMaeda - 07-20-2021
NYOYO ZETU
Kwa moyo mie nakiri, Natamka kwa ulimi
Nyota nimeitabiri, Nikawa sina usemi
Bora nifichue siri, Ninayempenda mimi
Ingawa tu mbalimbali, Nyoyo zetu si baida
Macho hayakukosea, Yalipokuona wewe
Na nafsi kungojea, Nikangiwa na kiwewe
Huu wangu upokea, Moyo nakupa mwenyewe
Ingawa tu mbalimbali, Nyoyo zetu si baida
Zama za tokea enzi, Nilikupenda kwa dhati
Moyo kujawa mapenzi, Kukupata ni bahati,
Naeleza kwa utenzi, Maandishi yenye hati
Ingawa tu mbalimbali, Nyoyo zetu si baida
Waja wa kale wanena, Ya kweli usikatae
Mahaba yenye kufana, Mpende akupendae
Simfanyie khiyana, Moyo wake uutwae
Ingawa tu mbalimbali, Nyoyo zetu si baida
Penzi sitie ukungu, Sitochoka kukungoja
Asali isiwe chungu, Wewe ndiwe namba moja
Usinitie machungu, Moyo damu ukatoja
Ingawa tu mbalimbali, Nyoyo zetu si baida
Kila jambo la msingi, Ndani yake lina kheri
Tutavikwepa vigingi, Tuepukane na shari
Mahasidi kwetu wingi, Usinambie kwaheri
Ingawa tu mbalimbali, Nyoyo zetu si baida
Penzi la watu wawili, Kulipangua mashaka
Nimeshapima akili, Kuamua nakutaka
Nakupenda kikamili, Sitoitoa talaka
Ingawa tu mbalimbali, Nyoyo zetu si baida
Unikumbuke kwa huba, Usingizini na ndoto
Tuitane mahabuba, Huku kipeana joto
Ulojaliwa mahaba, Na mapenzi motomoto
Ingawa tu mbalimbali, Nyoyo zetu si baida
Wala sione aibu, Na kuniwacha njiani
Unitibu nikutibu, La azizi u’mwandani
Tulishane na zabibu, Tukiwepo kitandani
Ingawa tu mbalimbali, Nyoyo zetu si baida
Tamati nimeshafika, Namalizia shairi
Nimechoka kuandika, Nimepungukwa na ari
Nakupenda kwa hakika, Mpenzi usighairi
Ingawa tu mbalimbali, Nyoyo zetu si baida
Na.
TRT Swahili