+- JIFUNZE KISWAHILI (https://jifunzekiswahili.co.tz)
+-- Forum: My Category (https://jifunzekiswahili.co.tz/forumdisplay.php?fid=1)
+--- Forum: Fasihi andishi (https://jifunzekiswahili.co.tz/forumdisplay.php?fid=7)
+---- Forum: Ushairi (https://jifunzekiswahili.co.tz/forumdisplay.php?fid=54)
+---- Thread: YA KALE YA KUKUMBUKWA! UPAMBAUKAO HUTWA (KWAHERINI) (/showthread.php?tid=2565)
YA KALE YA KUKUMBUKWA! UPAMBAUKAO HUTWA (KWAHERINI) - MwlMaeda - 05-13-2022
YA KALE YA KUKUMBUKWA!
UPAMBAUKAO HUTWA
(KWAHERINI)
1. Upambaukao hutwa, na kutwapo huwa giza,
Mtana hupetwa petwa, ukanyang'anywa mwangaza,
*Yaliza haya yaliza!*
2. Na sisi ule mtana, uliotupambauza,
Ulotupa kujuana, na mengi kuyafanyiza,
Leo waanza kununa, mitima kuiumiza,
*Laliza hili laliza!*
3. Hikumbuka tangamano, vyema tulivyolikuza,
Mi nanyi 'kawa mfano, wa lulu katika chaza,
Kisha leo saa hino, hiona twalikatiza,
*Laniliza! Laniliza!*
4. Hikumbuka ukarimu, na wema wenu nduguza,
Jinsi mulivyonikimu, myaka saba hatimiza,
Nahisi najidhulumu, Tanzania kuipeza,
*Ndipo hamba laniliza*
5. Ingawa menilazimu, na nyinyi kujiambaza,
Yondokayo ni sehemu, sehemu najibakiza,
Moyo wangu umo humu, Tanzania 'tausaza,
*Japo hivyo laniliza!*
6. Ni yangu matumaini, kwenu nayapendekeza,
Kwamba hwenda si jioni, nuru ingajipunguza,
Pengine wingu angani, ndilo lilojitandaza,
*Litakoma kutuliza?*
7. Na iwapo si hakika, hili nilowaambiza,
Jambo moja liso shaka, tusoweza lipuuza,
Utwao hupambauka, hauwezi ukaiza,
*Hapo halitatuliza.*
*ABDILATIF ABDALLA,*
*S.L.P. 35110,*
*DAR ES SALAAM.*
*SEPTEMBA 8, 1979.*
*NA KUCHAPO LITAKUCHWA*
( *KWA HERI YA KUONANA* )
1. Na kuchapo litakuchwa, likafungamana giza,
Na mchana ukaachwa, usiku ukajikweza,
Asubuhi ikafichwa, jioni ikatokeza,
*Yasikulize nyamaza.*
2. Nyamaza yasikulize, tuombeane Muweza,
Mitima aitulize, mapenzi kutujaliza,
Kwako kwetu atujaze, ya heri kutueneza,
*Usijilize nyamaza.*
3. Pia nasi kwa mfano, kwako tukielekeza,
Tuwazapo kongamano, kwenye yale mabaraza,
Kwenye mbinu kwenye ngano, machozi watwambukiza,
*Ndipo nasema nyamaza.*
4. Sisahau umuhimu, mengi umeniongoza,
Hasa kwa ile sehemu, diwani nilimaliza,
Ya mwenzetu marehemu, *Nyamaume* kuikuza,
*Nyamaza bwana nyamaza.*
5. Kilio hiki si chako, ni changu unaniliza,
Na giza hili si lako, ni langu lanikwamiza,
Mayonzi haya si yako, ni yangu yaniumiza,
*Ukilia waniliza.*
6. Kwa heri sisemi nenda, na siwezi kukataza,
Wendapo naona inda, nagubikizwa na kiza,
Nina nyang'anywa uwanda, uga gani nitacheza,
*Hapo kulia nyamaza.*
7. Wendako usisahau, nyuma kututumbuiza,
Kwa salamu angalau, heba ukatuliwaza,
Wemao hatusahau, buriani nanyamaza,
*Wacha kulia nyamaza.*
*SHAABAN C. GONGA,*
*S.L.P. 9031,*
*DAR ES SALAAM.*
*09 - 09 - 1979.*
*USHAIRI HARIJOJO?*
1. Kwa isimuye Rabana, Muumba na Muumbule,
Aliyeumba mchana, usiku uufatile,
Naomba kwake auna, nudhumu niipangile,
*Wapi ushairi ule, umekwenda harijojo?*
2. Ushairi wa maana, tulorithi kwa wakale,
Wenye mizani na vina, maudhui yatimile,
Urari, lugha mwanana, Kiswahili kiso ndwele,
*Wapi ushairi ule, umekwenda harijojo?*
3. Ushairi wenye taji, walotufunza wavyele,
Ulosheheni umbuji, na hekima teletele,
Si leo wa mfa maji, anayepiga kelele,
*Wapi ushairi ule, umekwenda harijojo?*
4. Beti nne kaditama, ukomo niufikile,
Mtima unaniuma, pingiti nizionile,
Zimetanda zinavuma, ni shangwe vigelegele!
*Wapi ushairi ule, umekwenda harijojo?*
*KHAMIS S.M. MATAKA,*
*S.L.P 70249,*
*DAR ES SALAAM.*
*18 - 09 - 2003.*