+- JIFUNZE KISWAHILI (https://jifunzekiswahili.co.tz)
+-- Forum: My Category (https://jifunzekiswahili.co.tz/forumdisplay.php?fid=1)
+--- Forum: Fasihi simulizi (https://jifunzekiswahili.co.tz/forumdisplay.php?fid=6)
+---- Forum: Ushairi (https://jifunzekiswahili.co.tz/forumdisplay.php?fid=50)
+---- Thread: SHAIRI : MIOYO YA WANAWAKE (/showthread.php?tid=1939)
SHAIRI : MIOYO YA WANAWAKE - MwlMaeda - 01-03-2022
Kalamu ninaandika,
Mioyo ya Wanawake, mwenzenu yanishangaza
Ina mapenzi lukuki, na huba za kutosheza
Kwa hili naipa heko, tena ninaipongeza
Mola ameiruzuku.
Ukweli usio shaka,
Mioyo ya Wanawake, Mungu ilimpendeza
Kuipunguzia chuki, na upendo kuongeza
Itutoe sononeko, pale linapotokeza
Kwenye za taabu siku.
Hili ninalianika,
Mioyo ya Wanawake, hodari kwa kuuguza
Hufanya kile na hiki, uwelewo kuupoza
Taabu na masumbuko, yenyewe huyapunguza
Na kurejesha shauku.
Kusema nalazimika,
Mioyo ya Wanawake, tulizo hututuliza
Japokuwa zao haki, sisi huzikandamiza
Hutupatia vicheko, japo tunaiumiza
Kwa mchana na usiku.
Tena nina uhakika,
Mioyo ya Wanawake, kwa kujali yaongoza
Kwenye faraja na dhiki, hutuondoshea kiza
Tuibebeni kwa mbeko, tuache kuipuuza
Na tuzo tuitunuku.
Elenzian_jk(Kalamu Ndogo)
elenzianjohns@gmail.com
+255625947688| 0655210909
Julai 18, 2019
Dar es salaam-Tanzania