+- JIFUNZE KISWAHILI (https://jifunzekiswahili.co.tz)
+-- Forum: My Category (https://jifunzekiswahili.co.tz/forumdisplay.php?fid=1)
+--- Forum: Fasihi simulizi (https://jifunzekiswahili.co.tz/forumdisplay.php?fid=6)
+---- Forum: Ushairi (https://jifunzekiswahili.co.tz/forumdisplay.php?fid=50)
+---- Thread: SHAIRI: MWAKA MPYA, JIPANGE UPYA (/showthread.php?tid=1912)
SHAIRI: MWAKA MPYA, JIPANGE UPYA - MwlMaeda - 01-01-2022
MWAKA MPYA, JIPANGE UPYA
Mwalimu ametwambia, Lupogo ametamka,
Mwaka unapofikia, upya Simama hakika,
Kaa ukifikiria, jiandae na zinduka,
*Mwaka Mpya umefika, upya jipange sikia.*
Upya jikaze sikia, jitahidi chakarika,
Jua palipo na nia, pambana njia kushika,
Kazana na pangilia, malengo utayafika,
*Mwaka Mpya umefika, upya jipange sikia.*
Lima na wako dhuria, tumia zana husika,
Lima kilimo huria, cha matunda na nafaka,
Lima ukimwagilia, na mbolea ukiweka,
*Mwaka Mpya umefika, upya jipange sikia.*
Tafuta na ulizia, masoko ya uhakika,
Chambua na fikiria, amua la muafaka,
Sitanie ukalia, usiujaribu mwaka,
*Mwaka Mpya umefika, upya jipange sikia.*
Tingisha na shikilia, jieleze na sikika,
Imba wasije kimbia, burudani wanataka,
Cheza mpira, kimbia, jiongeze huu mwaka,
*Mwaka Mpya umefika, upya jipange sikia.*
Tama hapa naishia, ya Lupogo kuandika,
Kwa ushairi jadiya, masivina sikutaka,
Heri ninawatakia, ya shari kuwaepuka,
*Mwaka Mpya umefika, upya jipange sikia.*
*Khamis S.M. Mataka*
*Dar es Salaam, 31.12.2021*