+- JIFUNZE KISWAHILI (https://jifunzekiswahili.co.tz)
+-- Forum: My Category (https://jifunzekiswahili.co.tz/forumdisplay.php?fid=1)
+--- Forum: Fasihi simulizi (https://jifunzekiswahili.co.tz/forumdisplay.php?fid=6)
+---- Forum: Ushairi (https://jifunzekiswahili.co.tz/forumdisplay.php?fid=50)
+---- Thread: SHAIRI: WIVU (/showthread.php?tid=1308)
SHAIRI: WIVU - MwlMaeda - 10-10-2021
WIVU
Sisemi kutaradadi, penzi lataka ujenzi
Moyo utatabaradi, linapostawi penzi
Wivu huwa ushahidi, humulika ja kurunzi
Wivu zao la mapenzi, ela chunga usizidi.
Abuu ~ Abii
Pandani
Wete - Pemba.
WIVU CHUMVI YA HUBA
Chochote kinachozidi, na kiwango kikavuka,
Sema bila taradudi, hicho kimekengeuka,
Kususwa hakina budi, kiache japo wataka,
Wivu 'kizidi mashaka, japo ni chumvi ya huba.
Khamis S.M. Mataka (PhD)
Dar es Salaam, Tanzania.
Ulilonena Sayyid, mwalimu ulotukuka,
Hiyo yako tashdidi, ubetini uloweka,
Hata sukari 'kizidi, chakula hakitalika,
Wivu ni Sunna hakika, tuchunge wake muradi.
Abuu ~ Abii
Pandani
Wete - Pemba.
MSI WIVU GENDAEKA!
Kweli ni Sunna hakika, Sunna ya Tumwa Rasuli,
Msi wivu gendaeka, hamo kundi la Rijali,
Mke wake akitoka, kona yeyeĺ hatojali,
Ni duyuthi bilkuli, msi wivu pulikeni.
Khamis S.M. Mataka
Dar es Salaam, Tanzania