JIFUNZE KISWAHILI

NINAKUPA MOYO WANGU
Moyo nimekupa shika, ewe wangu Malkia,
Ujue ninakutaka, silali nakulilia,
Malkia!

Nakuita Malaika, silali nikasinzia,
Hakika utanizika, nyonda kinikatalia,
Malkia!

Ondoa yako mashaka, kuwa nitakuchezea,
Maradhi yatanifika, nibakie kuugua,
Malkia!

Daima nakukumbuka, kisura usiye doa,
Mtoto ulofundika, na wale walokulea,
Malkia!

Basi naomba tamka, kuwa menikubalia,
Moyo wanipa shitaka, mwendani kukulia,
Malkia!

Nitajitoa sadaka, mwisho niage dunia,
Mapenzi yenye kilaka, siwezi kuvumilia,
Malkia!

Mrembo hebu itika, rabeka nikasikia,
Amini nitazeeka, nife na kujiozea,
Malkia!

Basi nambie haraka, moyo unanipasua,
Presha yanifumuka, chini Sasa nahemea,
Malkia!

Sasa imethibitika, mapenzi kweli mafua,
Njoo pamwe tukapika, kukata na kupakua,
Malkia!

Ona ninadhoofika, penzi linanitapia,
Nishike sijeanguka, uanze kunililia,
malkia!

Usidhani ninataka, shairi kukutungia,
Madhara yamenifika, sijiwezi nakwambia,
Malkia!

Beti kadha nimefika, laazizi fikiria,
Natamani kukushika, uso pamwe na kifua,
Malkia!

Mtunzi Filieda Sanga
MAMA B
Mabibo Dsm
0753738704