JIFUNZE KISWAHILI

SIFA KAMA ZAKO

Ayi! Nanena dhahiri, leo kila mtu yuko,
Ili utambuwe siri, usipate tatiziko,
Na uwache kufikiri, ukalipata sumbuko,
Bado ninamsubiri, mwenye sifa kama zako.

Wala sifanyi kikiri, nipate badala yako,
Mwenye akili titiri, kama zilivyo za kwako,
Mtu mwenye umahiri, asiye na hangaiko,
Bado ninamsubiri, mwenye sifa kama zako.

Namngojea mzuri, mithili ya huo wako,
Ambaye asiye ghuri, jeuri na mcharuko,
Aliyekosa kiburi, choyo hila na vituko,
Bado ninamsubiri, mwenye sifa kama zako.

Tambua mie amiri, niliyeketi kitako,
Usiku alfajiri, naomba dua mwenzako,
Anipatie Qahari, kwenye kila kitu chako,
Bado ninamsubiri, mwenye sifa kama zako.

Hapano langu shairi, limefika tamatiko,
Usiumie sadiri, nakupata sikitiko,
Nitasubiri kadiri, ndio mana hivi niko,
Bado ninamsubiri, mwenye sifa kama zako.

Mshairi Machinga,
mfaumehamisi@gmail.com,
+255716541703/752795964,
Dar es salaam, Kkoo.