JIFUNZE KISWAHILI

NA TUTENDE KWA UMOJA
Nabutadi kutunga, kwa jinale Subuhana,
Ndiye kanipa kutunga, kwa marefu na mapana,
Sana napenda kupanga, Mashairi yenye vina,
Na tutende kwa umoja, tushikaneni insia.

Wetu umoja ni kinga, adui awe hakuna,
Ni hasara kujitenga, mwenda peke mwendo hana,
Matata yatamzinga, hata akimbie sana,
Na tutende kwa umoja, tushikaneni insia.

Wadudu pia hupanga, pamwe husaidiana,
Siafu hutangatanga, wenyewe wakisongana,
Mizigo wakiifunga, vinywani kushikizana,
Na tutende kwa umoja, tushikaneni insia.

Nyuki umoja huchunga, daima wakipishana,
Wanaolinda mzinga, hawana kutegeana,
Kwenye mashine za unga, wadudu hutanguzana,
Na tutende kwa umoja, tushikaneni insia.

Ijapo mchwa humanga, kucha hao hupishana,
Kichuguu kukijenga, anayebisha hakuna,
Mtaka peke ni mwanga, hendi mbele kuuona,
Na tutende kwa umoja, tushikaneni insia.

Umoja huleta mwanga, siende kupapasana,
Ni Nani atatutinga, na madhila kusongana?
Tuwache kuvungavunga, vema tukikamatana,
Na tutende kwa umoja, tushikaneni insia.

Beti kadha nazifunga, nawasihi kushikana,
Moja jambo kulilenga, Kulifanya kwa mapana,
Msijitie uchanga, muende kwa kutengana,
Na tutende kwa umoja, tushikaneni insia.

Mtunzi Filieda Sanga
Mama B
Mabibo Dsm
0753738704