+- JIFUNZE KISWAHILI (https://jifunzekiswahili.co.tz)
+-- Forum: My Category (https://jifunzekiswahili.co.tz/forumdisplay.php?fid=1)
+--- Forum: Fasihi simulizi (https://jifunzekiswahili.co.tz/forumdisplay.php?fid=6)
+---- Forum: Ushairi (https://jifunzekiswahili.co.tz/forumdisplay.php?fid=50)
+---- Thread: SHAIRI : YAZAMISHE BAHARINI MAKOSA YA MKE WAKO (/showthread.php?tid=2013)
SHAIRI : YAZAMISHE BAHARINI MAKOSA YA MKE WAKO - MwlMaeda - 01-04-2022
Kwa mapana nakusifu
hakika metakasika
mola wangu mtukufu
Wa majini malaika
Fadhila zako kunjufu
kila pahala zafika
Kwa baba wa familia
Zifike zangu salamu
Kwenye maisha ya ndoa
Changamoto na matamu
Mkeo anakosea
Hakuumbwa maasumu
yazamishe baharini
Makosa ya mke wako
Ishi nae kwa makini
Huyo ni ubavu wako
simjeruhi usoni
Kumpiga iwe mwiko
Ni bahari ya mapenzi
yenye maji kila kona
Makosa ya kipuuzi
Jifanye hujayaona
Mpe bora ya malezi
Ajisikie mwanana
Usijitie ujeshi
Ati wampa adabu
Na makosa hayaishi
Kuwa mume si sababu
Ukiwa kwao mcheshi
Kwako mwanaume gubu
Madhali sio haramu
Vikosa vya kawaida
Mpe maneno matamu
Azidi pata faida
Maneno haya fahamu
Hukumuoa kwa shida
Ebwane mke hapigwi
kwa bakora za mitini
Anapigwa kwa mahaba
Yalozama baharini
Mzamishe habahaba
Hadi aloe mwilini
Ukihisi Anajuta
Kwa alichokufanyia
Mpe mabusu matata
Huku Ukimsifia
Mwambie”kwako nadata”
“Wala hujanikosea”
Mletee vizawadi
nyumbani ukirejea
Kuwa mume maridadi
Epuka kumkemea
Atakupenda zaidi
Haya Ukizingatia
Akikosea kupika
Tena isiwe kasheshe
jitahidi kuridhika
Chakula chake ukishe
Maneno haya hakika
Jaribu uhakikishe
Mkeo akikuudhi
Usivunje wake utu
utajitia maradhi
kukosoa kila kitu
Onyesha umemridhi
kununa usithubutu
Akiichupa mipaka
Ya haramu kuyafanya
Hapo hapana mashaka
Ni lazima kumuonya
Katu sifanye dhihaka
Ni wajibu kumkanya
Akikudai talaka
Nakusihi simjibu
Ni hasira kwa hakika
zitapoa taratibu
Ukipaniki haraka
ataenda pata tabu
Ataolewa na nani?
Ukishamuacha wewe?
Aolewe na muhuni?
atajijua mwenyewe?
Na weye taoa jini?
Hakosei kama wewe?
Ukingoni nimegota
Naomba kuwasilisha
Kwa pale nilipopata
Mola kaniwafikisha
Yarabi tupe thabata
Na ndoa kuzidumisha…
Mtunzi:
Al akh Abuu hafsa