+- JIFUNZE KISWAHILI (https://jifunzekiswahili.co.tz)
+-- Forum: My Category (https://jifunzekiswahili.co.tz/forumdisplay.php?fid=1)
+--- Forum: Fasihi simulizi (https://jifunzekiswahili.co.tz/forumdisplay.php?fid=6)
+---- Forum: Ushairi (https://jifunzekiswahili.co.tz/forumdisplay.php?fid=50)
+---- Thread: SHAIRI: MASKINI WA BAHATI TAJIRI WA MIKOSI (/showthread.php?tid=1971)
SHAIRI: MASKINI WA BAHATI TAJIRI WA MIKOSI - MwlMaeda - 01-03-2022
1. Jamani hii mikosi, kwangu inafata nini
Kuniandama kwa kasi, kosa langu silioni
Si mchana si weusi, na mimi hatuachani
MASIKINI WA BAHATI, TAJIRI WA MIKOSI
2. Kila ninapodadisi, kisa chake sibaini
Ni mimi mwenye nuksi, pekeyangu duniani
kwa wenzangu haigusi, ni kwangu ndio nyumbani
MASKINI WA BAHATI, TAJIRI WA MIKOSI
3. Bahati imenihasi, kwangu haionekani
Inanipita kwa kasi, tukikutana njiani
Mwenyewe ninajihisi, ninahitilafu fulani
MASKINI WA BAHATI, TAJIRI WA MIKOSI
4. Ninamuomba kudusi, mwenye nguvu duniani
Aniondolee nuksi, nami niwe furahani
Anipe japo kiasi, riziki asinikini
MASKINI WA BAHATI, TAJIRI WA MIKOSI
5. Kuhakikisha mikosi, ngoja niwachekesheni
Hata ningepewa pasi, ya mpira kiwanjani
Tagonga kwenye utosi, au upige puani
MASKINI WA BAHATI, TAJIRI WA MIKOSI
6. Naililia bahati, ifike kwangu nyumbani
Niipishe kwenye kiti, mwenyewe nikae chini
Niipigie magoti, kuiomba samahani
MASKINI WA BAHATI, TAJIRI WA MIKOSI
7. Kila nikijizatiti, mipango ya kila fani
Ili ujao wakati, nami nile kivulini
Hiyo raha siipati, inaishia ndotoni
MASKINI WA BAHATI, TAJIRI WA MIKOSI
8. Nimekaa najihisi, chakula kipo mezani
Njaa inanifilisi, chakula nakitamani
Tatumbukia papasi, chakula nakitamani
MASKINI WA BAHATI, TAJIRI WA MIKOSI
9. Usiku ninauhisi, najitupa kitandani
Kwanza nitoe kamasi, niipate afueni
Niikabidhi nafusi, kwa mola aloyakini
MASKINI WA BAHATI, TAJIRI WA MIKOSI
10. Mafisi yano nigasi, ninashituka ndotoni
Ninakimbia kwa kasi, kituo ni uwanjani
Jamani hii mikosi, kwangu itaisha lini?
MASKINI WA BAHATI, TAJIRI WA MIKOSI
Mchapishaji
Rajabu Salimu Abdul-razaq
?0659392247
Mtunzi
?ISMAIL RAJABU MPINI
? 09/04/1996
Mahali
?Kongwa-Magereza (Dodoma)
>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>
1. Maisha uvumilivu,
tafakuri kutumia,
Usithubutu uvivu,
juhudi kuzitegea,
Huwezi kupata mbivu,
ilhali wasinzia,
PAMBANA YA HELA YOTE,
UTATOBOA LAZIMA.
2. Uamkapo mapema,
Riziki kujiwahia,
Chagua yaliyo mema,
Upate kujifanyia,
Epuka kushika tama,
Kombo yakikuendea,
PAMBANA YA HELA YOTE,
UTATOBOA LAZIMA.
3. Chagua kazi halali,
Hutopata kashikashi,
Utavuna nyingi mali,
Bila wowote ubishi,
Ishike yangu kauli,
Uovu sikufundishi,
PAMBANA YA HELA YOTE,
UTATOBOA LAZIMA.
4. Kazi zote za haramu,
Epuka hatua miya,
Zidisha yako Nidhamu,
Kipato kitatuliya,
Sijifanye kichwa ngumu,
Shauri kutopokeya,
PAMBANA YA HELA YOTE,
UTATOBOA LAZIMA.
5. Bini Rajabu Mpini,
Tamaa sijejikatia,
Katuleta duniani,
Riziki mekadiria,
Insi nao majini,
Wote watajitwalia,
PAMBANA YA HELA YOTE,
UTATOBOA LAZIMA.
6. Kalamu imepasuka,
Wino inajimwagia,
Beti nilizoandika,
Zakutosha fikiria,
Nakwambia kukuruka,
Riziki kujitwalia,
PAMBANA YA HELA YOTE,
UTATOBOA LAZIMA.
Mtunzi:
Moh’d Potea (Mikpot)
Historia ilofifi
Kilwa – Tanzania
31 – 03 – 2019
11:57